Bakit nga ba tinawag na Nuestra Señora de los Desamparados ang ating patron?

Ano ang pinagmulan ng titulong ito?

Paano nalikha at sino-sino ang umukit sa imahe ng ating Ina?

Alamin natin yan at tuklasin!

Ang Nuestra Señora de los Desamparados ay ang titulong nagmula sa wikang Espanyol na ang salin sa Ingles ay Our Lady of the Forsaken. Ang debosyon sa Nuestra Señora de los Desamparados ay nagsimula noong taong 1409 sa Valencia, Espanya. Isang araw, si Padre Juan Gilberto-Jofre na isang paring Mercedarian ay patungo sa Katedral ng Valencia upang magmisa. Sa kanyang paglalakad, nakarinig siya ng kaguluhan sa kalye. Nakita niya ang isang lalaki sa lupa na tinatakpan ang kanyang ulo gamit ang kanyang mga braso habang ang mga grupo ng mga kabataan ay tinutuya siya at pinaghahampas.

Nagmadaling sumaklolo si Padre Jofre sa lalaki at hiniling na itigil na nila ang kanilang pananakit sa isa sa mga anak ng Diyos. Iniligtas ni Padre Jofre ang lalaki at napag-alaman niyang may sakit ito sa pag-iisip. Dinala niya ang lalaki sa Mercedarian monastery kung saan doon ay ginamot niya ang kanyang mga sugat at binigyan ito ng kanlungan.

Nang sumunod na Linggo sa Misa, ipinangaral ni Padre Jofre sa kanyang unang homilya ang tungkol sa mga taong may sakit sa pag-iisip. Ipinakiusap niya sa mga tao ang pangangailangan na maitayo ang isang lugar upang pangalagaan at makahanap ng masisilungan ang mga taong may sakit sa isip. Maraming tao ang ang naantig ang puso at bukas palad na nagbigay. Ang pera ay naging sapat at kinalaunan ay naipatayo ang isang tahanan at ospital na nakatuon sa Mahal na Ina sa ilalim ng titulong "Our Lady of Innocents".

Noong Agosyo 29, taon 1414, itinatag ang isang kapatiran na nakatuon sa pangangalaga sa mga may sakit sa pag-iisip. Tinawag itong "Brotherhood of Our Lady of the Insane and the Forsaken Innocents”.

Bumangon ang isang sitwasyon kung saan dumanas ng problema ang lupain na nagresulta sa pagpapalit ng pangalan ng kapatiran. Isang taggutom ang tumama sa lupain at marami ang mga batang naulila sa magulang. Kaya naman, mabilis na pinalawak ng kapatirang ito ang pangangalaga hindi lamang sa mga taong may sakit sa pag-iisip kundi sa maraming batang naulila at gumagala sa mga lansangan ng Valencia. Kaya isinaayos nila ang titulo, at ang bagong dedikasyon nila ay ang titulong "Our Lady of the Forsaken".

Napag-alaman ni Padre Jofre at ng kanyang mga kapatid na prayle na ang ospital na kanilang itinayo ay kulang sa silid-panalanginan. Kaya nagtayo sila ng isang oratoryo at nang ito ay matapos, alam nila na may kulang pa ito, kulang ito ng isang estatwa ng kanilang patronesa. Dahil wala silang mahanap na uukit ng imahe, sila ay pumasok sa silid-panalanginan para sa tulong na makahanap sila ng gagawa ng imahe.

Ayon sa alamat, hindi nagtagal ay may tatlong guwapong binata ang kumatok sa pintuan ng ospital at naghahanap sila ng kanlungan. Nag-alok sila na ukit ng rebulto ang kinakailangang bayad nila para sa kanilang pananatili sa ospital. Hiniling lamang nila na iwanan silang mag-isa para sa kanilang pagtatrabaho na hindi bababa sa tatlong araw.

Sa paglipas ng tatlong araw, nanatiling nakakulong ang tatlong binata sa loob ng silid. Nakikinig ang mga prayle sa may pintuan, ngunit wala silang narinig na kahit anong tunog. Sa pagtatapos ng ikatlong araw, muli silang kumatok sa pintuan, ngunit walang sumasagot. Sa wakas, pinilit nilang buksan ang pinto nang makita nila na wala na ang tatlong lalaki.

Sino kaya ang tatlong lalaki na iyon? Ang kanilang pagkakakilanlan ay kailanman hindi natuklasan ngunit karamihan sa mga tao ay mabilis na naniwala na ang mga anghel na ipinadala ng Diyos ang mga iyon. Kaya nagsimula ang alamat na tinatawag na "Elferen els angels" o Ginawa ng mga Anghel.

Ang nakita ng mga prayle sa gitna ng silid ay isang kahanga-hangang estatwa na nilikha ng mga lalaki. Nagsimulang mangyari ang mga himala, simula sa isang miyembro ng kapatiran hanggang sa mga paralisado at mga bulag.

Ang kapistahan ng “Our Lady of the Forsaken” o Nuestra Señora de los Desamparados ay ipinagdiriwang tuwing ikalawang Linggo ng Mayo sa Valencia sa bansang Espanya, katulad din ng mga simbahang may titulo nito sa buong mundo.

Ang Ina na Mag-ampon ay imahe ng isang ina na tumutugon sa mga panalangin ng kanyang mga anak na humihingi ng tulong. Siya ay ina na nagmamalasakit at umaampon sa lahat lalo na ang mga aba, pinakahuli at naliligaw sa lipunan. Siya ang inang namamagitan para sa atin at hinihikayat tayo palapit kay Hesus. Ang kanyang makapangyarihang panalangin ay nagdala ng hindi mabilang na sagot sa maraming tao na humihingi ng tulong sa kanya. Huwag tayong mag-atubiling lumapit sa kanya dahil hinding hindi tayo pababayaan ng ating Inang Mapag-ampon.

Nuestra Señora de los Desamparados, ipanalangin mo kami.

Jasper Rome | OLA Social Communications

#OLAmarikina #BirhenNgMarikina

-------

Mga Sanggunian:

Kathleensenior, & Kathleensenior. (2020, December 14). Was this statue of Our Lady made by angels? Aleteia — Catholic Spirituality, Lifestyle, World News, and Culture. https://aleteia.org/.../was-this-statue-of-our-lady-made.../

Our Lady of the Forsaken Festival. (2017, September 18). Visit Valencia. https://www.visitvalencia.com/.../our-lady-of-the...

De Oliveira, P. C. (n.d.). Our Lady of the Abandoned Ones, patron of May 12. https://www.traditioninaction.org/.../j126sdVirgenAbandon...